Ka ndërruar jetë profesori dhe atdhetari i devotshëm i çështjes kombëtare, Sabahajdin Cena.
Lajmin për ndarjen nga jeta e ka bërë të ditur kryetari i komunës së Rahovecit, Smajl Latifi i cili e quan atë “Njeriun që nuk u ndal për asnjë moment duke punuar, luftuar e shkruar…”.
Postimi i plotë:
Iku në amshim Profesor Sabahajdin Cena. Kur bien lisat e mëdhenj trandet edhe mali e fusha. Njeriun që nuk u ndal për asnjë moment duke punuar, luftuar e shkruar, e paska rrëzuar sëmundja e rëndë. Ai “i lau e i kjau” dëshmorët e Atdheut, këndoi e shkroi për bëmat e lavdinë dhe i gdhendi emrat e tyre në gurë; maleve, fushave e skaj rrugëve të atdheut. I bëri jehonë luftës së lavdishme të popullit shqiptar me emblemën e UÇK-së në krye. Prof. Dr. Sabahajdin Cena u bë një me luftën çlirimtare duke u bërë kronisti i kësaj historie të lavdishme në trojet shqiptare e më gjerë. Emri i tij do të gdhendet me shkronja ari, ndërsa kronikat e tij për UÇK-në do të vazhdojnë të bëjnë jehonë në histori. Lavdi e nderim për njeriun e pushkës e të penës, profesor Dr. Sabahajdin Cena! Ngushëllime familjes së ngushtë, farefisit, bashkëluftëtarëve dhe të gjithë atyre që ndjejnë dhembje për humbjen e Prof. Dr. Sabahajdin Cena!
