Zhvillimi i emocioneve dhe ndarja e tyre me të tjerët është një nga faktorët më vendimtarë për suksesin dhe mirëqenien personale, ka pohuar psikologu i njohur i shekullit XX, Erik Erikson. Ai ka ndërtuar një teori të zhvillimit njerëzor të ndarë në tetë faza, ku secila prej tyre luan një rol kyç në formimin e personalitetit.
Sipas Eriksonit, faza e gjashtë e këtij zhvillimi, që ndodh midis moshës 19 dhe 40 vjeç, përqendrohet te ndërtimi i marrëdhënieve të ngushta dhe intimiteti. Kjo është periudha kur njeriu synon të krijojë lidhje të qëndrueshme dhe të ndershme me të tjerët, dhe sipas tij, është një ndër fazat më vendimtare për rritjen personale dhe profesionale.
“Nëse në këtë periudhë nuk arrijmë të krijojmë lidhje të sinqerta dhe të thella, rrezikojmë të biem në izolim, ndjenjë vetmie dhe shmangie të afërsisë emocionale,” ka theksuar Erikson. Ai paralajmëron se izolimi mund të ndikojë negativisht jo vetëm në shëndetin mendor, por edhe atë fizik.
Psikologu nënvizon se shmangia e ndarjes së emocioneve shpesh lind nga frika ndaj refuzimit dhe mungesës së përkushtimit. Kjo, në afat të gjatë, mund të rezultojë në depresion, stagnim në zhvillim dhe madje sëmundje kardiovaskulare.
“Çdo njeri ka mundësinë të kalojë me sukses të gjitha fazat e zhvillimit, por kjo kërkon guxim për të ndarë veten me të tjerët dhe për të ndërtuar marrëdhënie të shëndetshme”, ka përfunduar Erikson.
Psikologët sot vazhdojnë të mbështeten në teoritë e tij, duke i konsideruar ato thelbësore për kuptimin e sjelljes dhe zhvillimit njerëzor në jetën moderne.
