Besimtarët myslimanë nga e gjithë bota fillojnë këtë të mërkurë pelegrinazhin e Haxhit, një nga pesë shtyllat kryesore të Islamit. Arabia Saudite ka konfirmuar se 1,475,230 pelegrinë nga jashtë kanë mbërritur në vend që nga e diela, ndërsa numri pritet të rritet ditët në vijim.
Pelegrinazhi vjen në një kohë sfiduese, për shkak të temperaturave ekstreme dhe fluksit të madh të njerëzve që grumbullohen në Mekë. Vitin e kaluar, temperaturat arritën deri në 47 gradë Celsius dhe mbi 1300 persona humbën jetën gjatë ritualeve.
Këtë vit, autoritetet saudite kanë paralajmëruar pelegrinët që të shmangin ekspozimin ndaj diellit gjatë orëve të ditës, përveç në rastet kur është e domosdoshme për kryerjen e ritualeve. Po ashtu, janë ndaluar fëmijët nën 12 vjeç të marrin pjesë në Haxh – një nga ndryshimet më të mëdha në politikën zyrtare të viteve të fundit.
Sipas autoriteteve, ky ndalim është një masë paraprake për sigurinë e fëmijëve, për shkak të turmave të mëdha dhe kushteve të vështira klimatike. Megjithatë, shumë prindër kanë shprehur dëshirën për t’i çuar fëmijët në Qabe, strukturën e shenjtë që është qendra e lutjeve ditore në Islam.
Arabia Saudite ka investuar miliarda dollarë në infrastrukturë, përfshirë ndërtimin e rrugëve shumëkatëshe, trenave me shpejtësi të lartë dhe sistemeve të avancuara të menaxhimit të turmave.
Për këtë vit, janë ndërmarrë masa për uljen e temperaturave në sipërfaqe, ndërsa për herë të parë dronët do të përdoren për monitorimin e pelegrinëve në kohë reale.
Haxhi zhvillohet një herë në vit, gjatë muajit të fundit të kalendarit islamik. Përveç ritualeve të Haxhit, shumica e pelegrinëve e përdorin këtë kohë për të vizituar qytetin e shenjtë të Medinës dhe për të kryer Umrah – një pelegrinazh më i vogël por i rëndësishëm në Islam.
