Një metodë e re nga Koreja e Jugut mund të diagnostikojë artritin brenda 10 minutave duke përdorur lëngje trupore, sipas një ekipi studiuesish të udhëhequr nga dr. Ho Sang Jung në Institutin Korean të Shkencës së Materialeve (KIMS), në bashkëpunim me Spitalin St. Mary në Seul.
Kjo teknologji e re mund të dallojë me saktësi mbi 94% osteoartritin nga artriti reumatoid përmes analizës së lëngut sinovial, një lëng që ndodhet në kyçet e trupit. Ajo përdor teknologjinë SERS (Surface-Enhanced Raman Scattering), e cila zbulon përbërës të padukshëm përmes përforcimit të sinjaleve optike dhe inteligjencës artificiale.
Studiuesit zbuluan dallime në përbërjen metabolike të këtij lëngu dhe përdorën algoritme për të identifikuar substancat që shkaktojnë artritin dhe për të vlerësuar ashpërsinë e tij, sidomos në rastin e artritit reumatoid.
Për të realizuar testimin, ata krijuan një sensor të thjeshtë me nanostruktura floriri në formë iriqi të vendosura mbi letër me thithje të lartë lagështie. Kjo lejon një analizë të shpejtë dhe efektive përmes lëngjeve trupore.
Në një provë me 120 pacientë, metoda tregoi saktësi mbi 95% në përcaktimin e shkallës së artritit reumatoid.
Dr. Jung theksoi se kjo teknologji jo vetëm që e bën diagnostikimin më të shpejtë dhe më të lirë, por gjithashtu mund të ndihmojë në monitorimin e trajtimit. Ai shtoi se plani i tyre është të zgjerojnë kërkimet për të përfshirë edhe sëmundje të tjera. / News Medical
