Marco Asensio është në prag të një kapitulli të ri në karrierën e tij, pasi largimi nga Paris Saint-Germain tashmë duket i pashmangshëm. Sulmuesi spanjoll, që iu bashkua gjigantëve francezë me shumë pritshmëri pas largimit nga Real Madridi, nuk arriti të gjejë hapësirën e dëshiruar në formacionin e Luis Enrique, shkruan 04 Online.
Konkurrenca e fortë në repartin ofensiv dhe mungesa e protagonizmit e kanë shtyrë 29-vjeçarin të kërkojë një destinacion të ri, larg dritave të Parisit. Pjesëmarrja e tij në fushë ka qenë më shumë simbolike sesa vendimtare, çka ka ndikuar edhe në dëshirën për të rigjetur vetveten në një ambient të ri.
Pavarësisht spekulimeve për një rikthim të mundshëm në LaLiga, ky opsion është zbehur ndjeshëm. Tani është Fenerbahçe që ka marrë avantazhin dhe është shumë pranë finalizimit të marrëveshjes me futbollistin.
Klubi turk, që ka nisur një projekt të ri ambicioz, po synon të forcojë skuadrën me emra me përvojë dhe cilësi. Asensio përputhet në mënyrë perfekte me këtë profil, dhe transferimi i tij shihet si një lëvizje strategjike për të rritur nivelin konkurrues në kampionat dhe në garat evropiane.
Nëse arrihet dakordësia për detajet e fundit të kontratës, zyrtarizimi mund të ndodhë brenda pak ditësh. Asensio pritet të ndërrojë fanellën pariziene me atë të Fenerbahçes, duke u vendosur në një mjedis ku mund të rigjejë minutat, rolin kryesor dhe besimin.
Një sfidë e re në Stamboll mund të jetë rikthimi i shumëpritur për një Asensio që kërkon të tregojë se ende ka shumë për të dhënë në futbollin europian./04 Online
