Topi i Artë i vitit 2018 dhe simbol i mesfushës së Real Madridit për më shumë se një dekadë, Luka Modric vazhdon të tregojë madhështinë e tij në fushën e lojës. Që nga transferimi nga Tottenham në gushtin e vitit 2012, kroati ka qenë një figurë kyçe për “Los Blancos”, shkruan 04 Online.
Me 561 paraqitje, 40 gola dhe 90 asistime për Realin, Modric dëshmoi sërish vlerën e tij mbrëmë kundër Deportivo Minera, ku shënoi një gol brilant në minutën e 55-të dhe kontribuoi në fitoren e pastër 5:0, në kuadër të Copa del Rey.
Pas ndeshjes, trajneri Carlo Ancelotti shprehu admirimin e tij për mesfushorin, duke e quajtur “një dhuratë për futbollin”.
“Është një dhuratë për të gjithë ata që e shijojnë nga afër – tifozët, lojtarët, trajneri… bota e Real Madridit. Për mua, Luka është një dhuratë e madhe. Ai përgatitet për çdo ndeshje si të ishte finale dhe është një shembull i shkëlqyer për të rinjtë tanë,” deklaroi Ancelotti pas ndeshjes.
Një paraqitje e tillë është dëshmi e vazhdimësisë dhe pasionit që Modric sjell në fushë, duke mbetur një nga emrat më të rëndësishëm në historinë e futbollit./04 Online
