Lidhja Rajonale e Futbollit në Prizren, me iniciativën e kryetarit Mirsad Çollaku, i ka propozuar Komunës së Prizrenit realizimin e një murali për sulmuesin e Kosovës dhe Mallorcas, Vedat Muriqin, shkruan 04 Online.
Sipas LRFP-së ky propozim synon ngritjen e një murali në qendër të Prizrenit si simbol krenarie dhe frymëzimi për të rinjtë.
Komunikata e plotë e Lidhjes Rajonale të Futbollit në Prizren
Lidhja Rajonale e Futbollit në Prizren me iniciativën e kryetarit z. Mirsad Çollaku, propozon Komunës së Prizrenit, konkretisht Drejtorisë për Kulturë, Rini dhe Sport (DKRS), për realizimin e një portreti mural në nder të kapitenit të Kombëtares së Kosovës, Vedat Muriqi.
Ky propozim synon të vendosë një vepër artistike publike në zemër të qytetit, si simbol i krenarisë lokale dhe frymëzim për brezat e rinj. Vedat Muriqi, lindur në Prizren, është shembulli më i mirë i suksesit të arritur përmes përkushtimit, kulturës dhe punës së palodhur. Ai ka arritur majat e futbollit ndërkombëtar, duke mbajtur me dinjitet fanellën e Kosovës dhe duke përfaqësuar qytetin e tij me krenari.
Një mural për Vedatin nuk është vetëm një nder për të si individ, por një mesazh i fuqishëm për të gjithë të rinjtë tanë që ëndrrat janë të arritshme, ai është një model i jashtëzakonshëm që meriton të jetë pjesë e peizazhit kulturor të Prizrenit.
Lidhja Rajonale e Futbollit shpreson që Komuna e Prizrenit dhe DKRS ta marrin në konsideratë këtë nismë dhe të bashkëpunojnë sëbashku për të gjetur një lokacion të përshtatshëm në qendër të qytetit, ku kjo vepër të mund të realizohet dhe të lansohet në një të ardhme të afërt.
