Liverpooli raportohet se ka rihapur bisedimet për një transferim në janar që mund t’i shpëtojë sezonin.
Pas fitimit të Ligës Premier në sezonin e parë të Arne Slot në krye të ekipit, “Të Kuqtë” shpenzuan shumë gjatë afatit kalimtar të verës për të shtuar emra të rinj në skuadër.
Emra si Alexander Isak, Florian Wirtz, Hugo Ekitike, Milos Kerkez dhe Jeremie Frimpong mbërritën në “Anfield” në një fushatë blerjesh që i kaloi 400 milionë eurot.
Megjithatë, përgatitjet e Liverpoolit për mbrojtjen e titullit u goditën rëndë nga vdekja tragjike e Diogo Jotës, i cili humbi jetën së bashku me vëllain e tij, Andre, pas një aksidenti automobilistik në Spanjë.
Në fillim të sezonit 2025/2026, Liverpooli pati një nisje shumë premtuese duke fituar pesë ndeshjet e para.
Por më pas gjërat nisën të shkonin keq, teksa forma e ekipit ra ndjeshëm dhe ata kanë humbur nëntë nga 13 ndeshjet e fundit.
Me afatin kalimtar të janarit në prag, është raportuar se Liverpooli ka rihapur bisedimet për të nënshkruar me Marc Guehi nga Crystal Palace.
Gjatë afatit kalimtar të verës, një marrëveshje prej 35 milionë eurosh për Guehin u prish në momentet e fundit pasi Palace refuzoi të shiste, për shkak se nuk arriti të gjente një zëvendësues të përshtatshëm.
Tani, sipas TEAMtalk, Liverpooli është i gatshëm të ofrojë mes 25 dhe 30 milionë euro për 25-vjeçarin.
Me kontratën e tij që skadon në fund të sezonit, Guehi është i lirë të bisedojë me klube jashtë Anglisë dhe të nënshkruajë një para-kontratë për një transferim të lirë verën e ardhshme.
Përveç Liverpoolit, edhe Real Madrid, Bayern Munich dhe Barcelona kanë shprehur interes për mbrojtësin e kombëtares angleze./Telegrafi/
