Qeverisja e kryetarit të Komunës së Prizrenit, Shaqir Totaj përgjatë 33 muajve të shkuar është cilësuar si e dështuar nga grupi i këshilltarëve të Lëvizjes Vetëvendosje në Kuvendin e Komunës së Prizrenit.
Shefi i këtij grupi opozitar, Karanfil Haxhillari ka vlerësuar se kryetari Totaj nuk i ka përmbushur premtimet e dhëna gjatë fushatës paraelektorale të vitit 2021.
“Vet fakti që pothuajse të gjitha premtimet elektorale të cilat i ka dhënë në vitin 2021, dhe asnjë nuk e ka realizuar, me të vërtetë asnjë, kjo nënkupton se çfarë qeverisjeje kemi pasur për katër vite me radhë. Pra shumë thjeshtë, një qeverisje e dështimeve, ku edhe fjalët e veta nuk ka arritur që ti mbajë. Shumë e thjeshtë”, ka thënë Haxhillari për Telegrafin.
Sipas tij edhe projektet që janë realizuar nuk kanë qenë të planifikuara në mënyrë të duhur, ngase disa herë është intervenuar në to.
“Të gjitha ato projekte infrastrukturore, të cilat i kanë filluar dhe i kanë realizuar të gjitha kanë qenë të marra për dore themi nga tri herë për ti punuar. Shtro asfalt, prish asfalt, shtro asfalt. Hiq kubëza, vendos kubëza, prapë shtro kubëza. Pra kjo është vetëm nëpërkëmbje e buxhetit dhe e parave të taksapaguesve të Komunës së Prizrenit”, ka deklaruar Haxhillari për Telegrafin.
Kryetari i Komunës së Prizrenit, Shaqir Totaj, mandatin e ka marrë në dhjetor të vitit 2021, dhe në janar të vitit 2022 ka emëruar drejtorët e Ekzekutivit lokal. Ai pat premtuar qeverisje të mirë në shërbim të qytetarëve. /Telegrafi/
