Kosova e ka nisur mbarë rrugëtimin në Lojërat Olimpike “Paris 2024”.
Boksierja kosovare, Donjeta Sadiku triumfoi kundër boksieres nga Tajlanda, Thananya Somnuek në meçin e zhvilluar të shtunën në Lojërat Olimpike Paris 2024.
Triumfi ka qenë pas numërimit të pikëve, me ç’rast doli se boksierja kosovare ka mbledhur më shumë. Ishte raundi i tretë ai ku Sadiku e ka bërë dallimin.
Pas këtij meçi është deklaruar edhe kryeministri i Kosovës, Albin Kurti, i cili u shpreh i lumtur me këtë fitore të boksieres kosovare.
“Është fitore shumë e rëndësishme dhe fitore tejet e merituar e boksieres tonë, Donjeta Sadiku. Fitore me këmbë të mbarë për ekipin e Kosovës në Lojërat Olimpike, pasi tash, xhudo, atletika dhe noti do ta kenë si prirëse këtë fitore të Sadikut. Boksierja kundërshtare ishte e fokusuar ta shtyej në kënd Sadikun, por ajo kishte saktësi dhe shumësi në goditje. Një kontribut fare të vogël e dhamë edhe ne në brohoritjet tona, Kosova Kosova dhe Donjeta Donjeta”, tha Kurti.
