Kryeministri i Kosovës, Albin Kurti, ka thënë se formimi i Asociacionit është pjesë e marrëveshjes me Serbinë, por nuk është vet marrëveshja, duke shtuar se duan një plan të zbatimit i cili është i hollësishëm, konkret, i balancuar dhe gjithëpërfshirës.
Kreu i Qeverisë ka thënë se pala kosovare është e interesuar të zbatohet në tërësi marrëveshja, e jo vetëm neni 7 i saj.
“Natyrisht se neni 7 është pjesë e marrëveshjes, por neni 7 nuk është marrëveshja dhe këtë gjë zëvendëskryeministri Bislimi e ka bërë të qartë mbrëmë në Bruksel dhe gjithashtu kemi theksuar se dëshirojmë një plan zbatimi i cili është i hollësishëm, konkret, i balancuar dhe gjithëpërfshirës. Nuk mund të jetë plani i zbatimit i sekuencuar për marrëveshjen që e kemi bërë, vetëm në nenin 7”, u shpreh Kurti, në një deklarim për media pas përfundimit të ceremonisë së themelimit të Shoqatës së miqësisë austriako-kosovare.
Ai ka thënë se ende nuk kanë marrë raport nga Bashkimi Evropian (BE) mbi denoncimet e Kosovës për shkeljet e marrëveshjes nga ana e Serbisë.
“Në takimin e 2 majit të nivelit të lartë, unë i kam dorëzuar një dokument me të gjitha shkeljet e Serbisë edhe të Marrëveshjes bazike të 27 shkurtit në Bruksel, por edhe të marrëveshjes së Ohrit, mirëpo deri më sot nga ndërmjetësit nuk kemi një qëndrim të denoncimit tonë mbi shkeljet e Serbisë. Ne jemi të interesuar për zbatim të plotë e të menjëhershëm të marrëveshjes, pra pa kushte dhe pa vonesa. Pra është problemi te pala tjetër e cila nga pesë pikat e preambulës dhe 10-të nenet e marrëveshjes, ajo dëshiron që ne të përqendrohemi vetëm tek neni 7”, ka theksuar Kurti./EO
