Kryeprokurori i Prokurorisë Themelore në Prizren, Petrit Kryeziu, zhvilloi një tryezë diskutimi me përfaqësues të shoqërisë civile dhe mediave, ku prezantoi draft-planin e punës për vitin 2025.
Kryeziu theksoi rëndësinë e paraqitjes së objektivave dhe planit të veprimit për periudhën janar–dhjetor 2025, duke garantuar transparencë dhe angazhim të strukturuar për përmirësimin e punës së Prokurorisë Themelore në Prizren, shkruan 04 Online.
“Kryeprokurori i Prokurorisë Themelore në Prizren, Petrit Kryeziu, ka mbajtur tryezë diskutimi me përfaqësues të shoqërisë civile dhe mediave, ku para tyre ka prezantuar “draft/planin e punës për Prokurorinë Themelore të Prizrenit për vitin 2025”.
Kryeprokurori Kryeziu, para të pranishmëve theksoi se kjo tryezë ka për qëllim të paraqesë në mënyrë të strukturuar objektivat dhe planin e veprimit për periudhën Janar – Dhjetor 2025.
Në takim, Kryeprokurori Kryeziu, potencoi se plani i punës për vitin 2025 mes tjerash ka për qëllim ngritjen e efikasitetit, transparencës dhe llogaridhënies si dhe rritjen e besimit të publikut.
Ai, theksoi se plani i punës në vete përmban organizimin e prokurorisë dhe përmban njëzet objektiva, ku bëri një prezantim të shkurtër për secilën objektivë veç e veç, ku ndër të tjera theksoi se pesë objektivat kryesore për vitin 2025 do të jenë: luftimi i veprave penale kundër korrupsionit, fajdeja, narkotikët, dhuna në familje dhe krimet kundër mjedisit
Gjithashtu, në këtë takim ishin të pranishëm edhe prokurorë përfaqësues nga tri departamentet e kësaj prokurorie.
Përfaqësuesit e shoqërisë civile dhe mediave, patën mundësinë që të japin vërejtje dhe rekomandime për planin e punës së prokurorisë.
Të pranishmit vlerësuan se diskutimet e tilla janë të mirëseardhura dhe janë në interes të përgjithshëm për luftimin e veprave penale që janë nën kompetencën ligjore dhe territoriale të Prokurorisë Themelore të Prizrenit. Të pranishmit parashtruan pyetje lidhur me çështje të ndryshme që kjo prokurori i ka në trajtim, për të cilat morrën përgjigje nga Kryeprokurori Kryeziu.
Kryeprokurori Kryeziu, falenderoi të pranishmit për kontributin e tyre, ku njëkohësisht u zotua se rekomandimet e marra gjatë këtij takimi do të shqyrtohen për përfshirjen e tyre si pjesë e planit final të punës, i cili do hartohet nga kjo prokurori.”, thuhet në njoftimin e Prokurorisë Themelore në Prizren./04 Online
