Këshilli i Ambasadorëve Shqiptarë ka kërkuar nga Kuvendi i Shqipërisë që Dita e Pavarësisë së Kosovës të shpallet festë zyrtare në Shqipëri, raporton Gazeta Sinjali.
Përmes një komunikate për medie, ky këshill ka kërkuar që Kuvendi të fillon këtë iniciativë ligjore.
Këshilli i Ambasadorëve Shqiptarë ka bërë me dije se një veprim i tillë do t`i gëzonte të gjithë shqiptarët.
“Duke vlerësuar 17 Shkurtin e vitit 2008, ditën e shpalljes së Pavarësisë së Republikës së Kosovës, si një nga ngjarjet më të rëndësishme në historinë tonë kombëtare; si përmbushjen e një aspirate shekullore të kombit tonë në rrugën e tij drejt forcimit të identitetit, bashkimit kombëtar dhe integrimit në strukturat Euro – Atlantike; si një ditë të shënuar që frymëzon çdo shqiptar; si ngjarje madhore për të cilën kanë kontribuar shqiptarët anembanë botës, me mbështetjen e fuqishme të SHBA-ve, BE-së, NATOs dhe vendeve të tjera aleate dhe mike, Këshilli i Ambasadorëve Shqiptarë i ka drejtuar një kërkesë zyrtare Kuvendit, më dt. 21 Shkurt 2023, për të ndërmarrë nismat përkatëse ligjore për ta shpallur këtë datë Festë Zyrtare të Republikës së Shqipërisë. Këshilli i Ambasadorëve Shqiptarë beson se një vendim i tillë do të gëzonte dhe do të mbështetej nga çdo shqiptar kudo ku jeton, pavarësisht bindjeve politike”, është thënë në njoftimin e këshillit.
