Prej kohësh, mjekët nuk kanë qenë të sigurt nëse kafeina ndikon negativisht te njerëzit që vuajnë nga fibrilacioni atrial ose siç njihet ndryshe, A-fib, një çrregullim i zakonshëm i zemrës që shkakton rrahje të parregullta dhe të shpejta, si dhe mund të çojë në insuficiencë kardiake, mpiksje gjaku apo sulm në tru, ka shkruar NBC News.
Një studim i ri tregon se konsumimi i kafesë me kafeinë është i sigurt për njerëzit që kanë A-fib dhe madje mund të ndihmojë në parandalimin e përsëritjes së këtij problemi.
“Nuk ekziston ndonjë këshillë standarde për pacientët me fibrilacion atrial dhe kafeinën. Shpesh takoj pacientë që kanë ndaluar së piri kafe vetëm sepse mjeku u ka thënë ta shmangin për shkak të A-fib”, ka thënë kardiologu Gregory Marcus, profesor në Universitetin e Kalifornisë në San Francisko, i cili udhëhoqi studimin DECAF (Does Eliminating Coffee Avoid Fibrillation?).
Si u zhvillua studimi
Studimi që zgjati katër vjet, u prezantua në konferencën vjetore të American Heart Association në New Orleans dhe u publikua në revistën JAMA. Në të morën pjesë 200 të moshuar nga Australia, Kanadaja dhe SHBA, me moshë mesatare 70 vjeç; një e treta ishin gra.
Pjesëmarrësit u ndanë në dy grupe: njëri grup ndaloi kafeinën, ndërsa tjetri pinte të paktën një filxhan kafe në ditë. Gjatë gjashtë muajve, ata raportuan vetë konsumimin e tyre të kafesë përmes kontrolleve me video ose telefon.
Mjekët monitoruan zemrën e tyre përmes EKG-ve dhe pajisjeve që vishen apo të implantueshme për të parë nëse do të përsëritej ndonjë episod i fibrilacionit atrial ose atrial flutter, një çrregullim i ngjashëm.
Rezultatet
Gjatë periudhës gjashtëmujore, 56 për qind e pjesëmarrësve patën një përsëritje të çrregullimit, por ata që pinin kafe kishin më pak gjasa ta përjetonin përsëri:
-Vetëm 47 për qind e grupit që pinte kafe patën rikthim të A-fib,
-Kundrejt 64 për qind të atyre që nuk pinin.
Për më tepër, grupi që konsumonte kafe kaloi më shumë kohë pa episode të rrahjeve të parregullta.
Megjithatë, rreth një e treta e pjesëmarrësve në grupin “pa kafe” pranuan se kishin pirë të paktën një filxhan gjatë studimit.
Një filxhan në ditë është “plotësisht i sigurt”
“Jam disi i habitur nga shkalla e mbrojtjes që duket se ofron kafeja me kafeinë për të parandaluar fibrilacionin atrial”, ka thënë Marcus.
Edhe kardiologia Johanna Contreras nga spitali Mount Sinai Fuster Heart Hospital në New York, e cila nuk ishte pjesë e studimit, ka theksuar se gjetja më e rëndësishme është siguria, jo domosdoshmërish efekti mbrojtës.
“Një filxhan kafe në ditë duket të jetë plotësisht i sigurt për njerëzit me A-fib. Nuk ka rregull të prerë, sepse jo të gjithë reagojnë njësoj ndaj kafeinës”, ka thënë ajo.
Ajo ka shtuar se moderimi është thelbësor:
“Nëse dikush pi gjashtë apo shtatë filxhanë në ditë, dhe pastaj pije energjike si Red Bull apo Celsius, kjo është tjetër gjë”, ka thënë ajo.
Shkencëtarët ende nuk janë të sigurt pse kafeja ndihmon. Marcus ka sugjeruar se një përbërës anti-inflamator në kafe, dhe jo domosdoshmërish kafeina, mund të ketë reduktuar përsëritjen e A-fib.
Një teori tjetër është se kafeina stimulon adrenalinën, e cila mund të pengojë shfaqjen e episodeve të A-fib që shpesh ndodhin kur trupi është në gjendje relaksi, për shembull gjatë gjumit ose pas një vakti të madh.
Megjithatë, ai paralajmëroi se këto gjetje nuk vlejnë për njerëzit që janë aktualisht në një episod aktiv të A-fib, sepse në atë rast kafeina mund ta rrisë rrahjen e zemrës dhe t’i përkeqësojë simptomat.
“Nëse dikush është në mes të një episodi të A-fib, kafeina mund të rrisë ritmin e pulsit dhe të përkeqësojë ndjesitë”, ka thënë Marcus.
Në fund, nëse jeni konsumues i rregullt i kafesë, ky është një lajm i mirë.
“Ky studim tregon se mund të pini një filxhan kafe në mëngjes dhe të jeni në rregull, edhe nëse keni A-fib”, ka thënë Contreras.
