Një studim zbuloi se gratë që pinë kafe me kafeinë kanë më shumë gjasa të jetojnë një jetë më të gjatë dhe më të shëndetshme, ndërsa e njëjta gjë nuk vlen për ato që konsumojnë çaj ose kafe pa kafeinë.
Ky studim e gjerë, përfshiu pothuajse 50,000 gra të ndjekura për 30 vjet, tregoi se një filxhan kafeje me kafeinë që shumë gra konsumojnë çdo mëngjes ofron përfitime që shkojnë përtej rritjes së energjisë. Sipas rezultateve të paraqitura në konferencën USHQYERJA 2025 të Shoqatës Amerikane të Dietologjisë, e zhvilluar në Orlando, Florida, nga 31 maji deri më 3 qershor, kafeja ndihmon gratë të mbajnë mendjen e mprehtë, trupin të fortë dhe shëndetin mendor të mirë gjatë plakjes.
Analiza zbuloi se gratë që konsumonin kafe me kafeinë në moshën e mesme kishin më shumë mundësi të plakeshin në mënyrë të shëndetshme. Në anën tjetër, këto përfitime nuk u panë tek gratë që konsumonin çaj ose kafe pa kafeinë. Për më tepër, konsumimi i lartë i pijeve me kola, që gjithashtu përmbajnë kafeinë, lidhet me shanse më të ulëta për një plakje të shëndetshme.
“Ndërsa studimet e mëparshme kanë lidhur kafenë me përfitime individuale shëndetësore, studimi ynë është i pari që vlerëson ndikimin e kafesë në shumë parametra të plakjes gjatë një periudhe shumë të gjatë, më shumë se tre dekada,” tha Dr. Sarah Madavi, studiuese postdoktorale në Shkollën e Shëndetit Publik T.H. Chan të Harvardit dhe profesoreshë asistente në Universitetin e Torontos.
“Rezultatet tona tregojnë se kafeja me kafeinë, por jo çaji apo kafeja pa kafeinë, ndihmon në ruajtjen e funksioneve të mira mendore dhe fizike gjatë plakjes.” shtoi ajo.
