Rrjeti social Instagram është duke testuar një veçori që ua mundëson njerëzve të fshijnë të gjithë përmbajtjen që u rekomandohet. Veçoria “e resetimit” – që së shpejti do të jetë në dispozicion për të gjithë – do të mundësojë pastrimin e përmbajtjes që algoritmi i rrjetit social ia ofron përdoruesit.
Megjithatë, Instagrami ka thënë se rekomandimet “do të nisin të personalizohen sërish përgjatë kohës”. Duke i resetuar këto rekomandime, përdoruesit do të shohin përmbajtje tjetër në hapësirat “explore”, “home” dhe “reels”.
Si shembull, nëse dikur keni pëlqyer video të recetave të ushqimit dhe pavarësisht se tani s’jeni të interesuar në to, përmbajtje të ngjashme shfaqen në hapësirat “reels” dhe “explore”. Sapo që të resetohen rekomandimet, gjithçka nis nga fillimi dhe përmbajtja do të sugjerohet varësisht nga përmbajtja me të cilën përdoruesi ka angazhim.
Po ashtu kur dikush synon t’i resetojë rekomandimet, do ta ketë opsionin edhe për të rishikuar listën e personave që i ndjek, për t’i fshirë përdoruesit që shpërndajnë përmbajtjen për të cilën më s’keni interesim.
