Pompat e derivateve shpeshherë janë vendi ku mes të rinjve shpërthejnë konfliktet, të cilat për pasojë eskalojnë edhe në përleshje verbale e fizike, si në kanosje. Të tilla raste ndodhin kryesisht në orët e vona të natës, pasi këto biznese veprojnë edhe pas mesnate. Kështu ka ndodhur edhe të shtunën, në restorantin e HIB Petrol në rrugën “Ekrem Rexha” në Prizren, raporton Gazeta Sinjali.
Këtë herë, i dyshuar është një 40-vjeçar, i cili po dyshohet se për motive ende të panjohura ka kërcënuar menaxherin e kësaj pike, si dhe punëtorët, që kanë qenë brenda hapësirave të pompës.
Burimet nga Prokuroria kanë bërë me dije se bëhet fjalë për G.B., (emër i njohur për redaksinë), i cili derisa ka qenë në gjendje të dehur, ka hyrë në HIB dhe ka filluar t’i kërcënojë punëtorët dhe menaxherin e tyre.
Për shkak të shqetësimit të krijuar, është raportuar menjëherë incidenti, me ç’rast Policia ka intervenuar në vendin e ngjarjes, ku është arrestuar i dyshuari.
Sinjali mëson se i njëjti është shoqëruar në stacion policor, ku fillimisht nuk është intervistuar për shkak të gjendjes së tij, nën ndikimin e alkoolit.
Pas përfundimit të procedurave policore, Prokurori i Shtetit ka urdhëruar caktimin e masës së ndalimit policor dhe inicimin e rastit për veprën penale ‘Kanosje’.
