Tensioni i lartë i gjakut, apo hipertensioni, mbetet një nga problemet më serioze shëndetësore të kohës moderne. Ai shpesh nuk shfaq simptoma të dukshme për vite me radhë, duke rritur rrezikun për sëmundje të zemrës, tru dhe veshka.
Pikërisht për këtë arsye quhet “vrasësi i heshtur”. Shumë persona nuk e kuptojnë që kanë tension të lartë derisa të përballen me pasoja serioze, si goditje në tru apo infarkt.
Ekspertët rekomandojnë matje të rregullta të tensionit, qoftë në qendra shëndetësore apo në shtëpi, me pajisje të thjeshta digjitale.
Ndër simptomat më të zakonshme që mund të lidhen me tensionin e lartë janë: Dhimbjet e kokës (sidomos në pjesën e pasme), Shikimi i turbullt, Vështirësitë në frymëmarrje, Dhimbjet në gjoks, Gjakderdhja nga hunda, Urina me shkumë (shenjë e mundshme e dëmtimit të veshkave).
Njohja e këtyre shenjave dhe ndërhyrja e hershme janë çelësi për parandalimin e komplikimeve serioze.
