Ministri i Financave, Punës dhe Transfereve, Hekuran Murati, ka reaguar pas nënshkrimit të vendimit përfundimtar për liberalizimin e vizave për qytetarët e Republikës së Kosovës, raporton Gazeta Sinjali.
Përmes një postimi në rrjetin social Facebook, Murati ka thënë se dita e djeshme është një ditë e veçantë për Kosovën, teksa meritore për këtë arritje e ka bërë Qeverinë Kurti.
“Sot ishte një ditë e veçantë me rastin e nënshkrimit të vendimit përfundimtar për liberalizimin e vizave. Diçka që pushtetet e kaluara nuk kishin arritur ta bënin për një dekadë, u bë për dy vite qeverisje!”, shkroi ai.
Ministri po ashtu tha se mosbesimi i qytetarëve karshi liberalizimit është i natyrshëm sepse, siç tha ai, kjo është pasojë e mashtrimeve të Qeverive të kaluara në emër të vizave.
“Është normale që sot, për shumë qytetarë kjo arritje edhe duket e pabesueshme, dhe ende e shohin me skepticizëm. Sepse me vite të tëra, garda e vjetër premtoi e mashtroi në emër të vizave. Madje u fal edhe tokë në emër të vizave dhe vizat prap nuk erdhën.”, ka shkruar Murati.
