La Liga i ka kushtuar një postim të veçantë sulmuesit kosovar Vedat Muriqi, pas paraqitjes së shkëlqyer me fanellën e Mallorcës në javën e fundit të kampionatit spanjoll.
Muriqi realizoi hat-trickun e tij të parë me Mallorcën, duke konfirmuar formën e jashtëzakonshme që po kalon këtë sezon. Me këto tre gola, 31-vjeçari ka hyrë në historinë e klubit, duke u bërë golashënuesi i dytë më i mirë i Mallorcës në La Liga – një arritje e madhe për një lojtar që është shndërruar në lider të padiskutueshëm të repartit ofensiv.
Postimi i La Ligës thekson rolin vendimtar të Muriqit në sukseset e skuadrës, duke e cilësuar atë si një nga sulmuesit më efikasë dhe më të rrezikshëm të sezonit. Loja ajrore, fuqia fizike dhe instinkti i tij para portës kanë bërë që mbrojtjet kundërshtare ta kenë gjithnjë e më të vështirë për ta ndalur.
Në super formë, Muriqi po udhëheq Mallorcën jo vetëm me gola, por edhe me autoritet në fushë, duke u shndërruar në simbol të ambicieve të klubit për këtë edicion. Paraqitjet e tij po i sjellin vlerësime të vazhdueshme nga tifozët, mediat dhe vetë La Liga.
Forma aktuale e sulmuesit kosovar dëshmon se ai është një nga emrat më në formë në futbollin spanjoll dhe një futbollist që po lë gjurmë të forta në historinë e Mallorcës./04 Online
