Lideri i Aleancës për Ardhmërinë e Kosovës, Ramush Haradinaj, ka insistuar se mocioni i mosbesimit ndaj Qeverisë Kurti është opsioni i vetëm për të dalë nga kriza.
Haradinaj është shprehur se partia e tij e ka ndihmuar opozitëbërjen me guximin për mocion.
“Besoj se guximi politik i Aleancës, guximi për t’i marrë përsipër rreziqet e mocionit është në shërbim të vendit. Po them rreziqet sepse duam t’i dalim ballë një pushteti të kapur, me lidhje e shkurta, me korrupsionin që po i del në dritë, me agjendën që po na armiqëson me ata që i kemi në interes jetik, me dëmet që po ia shkakton vendit si në planin e brendshëm dhe atë të jashtëm është ndihmesë, ne e kemi ndihmuar opozitëbërjen me guximin tonë për mocion”, ka thënë Haradinaj.
Haradinaj tha se bashkimi i votës së opozitës për rrëzimin e qeverisë është në interes të Kosovës, derisa mungesa e koordiminit të opozitës është në shërbim të kryeministrit Kurti.
“Ata që e dojnë Kosovën nuk ishte dashtë t’i pengoj nxitimi i Aleancës nëse është nxitim, se ne jemi vonu, por nëse është nxitim, unë besoj se bashkimi i opozitës me votë në mocion është fitore e demokracisë në Kosovë, është fitore e Kosovës, është e arritur e respektuar vetëm bashkimi i votës tonë”, ka thënë Haradinaj në Rubikon.
