Barcelona shënoi një fitore të paharrueshme kundër Real Madridit në finalen e Superkupës së Spanjës, duke triumfuar me rezultat bindës 5:2, shkruan 04 Online.
Ky sukses i madh, arritur në Arabinë Saudite, shënoi gjithashtu trofeun e parë për trajnerin Hansi Flick, i cili mori drejtimin e ekipit katalanas vetëm verën e kaluar.
Pas ndeshjes, Flick vlerësoi maksimalisht skuadrën e tij për performancën e jashtëzakonshme dhe shpirtin e ekipit që demonstruan në fushë.
“Kjo skuadër është e mrekullueshme. Lojtarët dhanë gjithçka në këtë ndeshje dhe meritonin plotësisht këtë fitore. Kemi mbetur të bashkuar në çdo moment, qoftë në mbrojtje apo në sulm. Ky ishte çelësi ynë sonte. Objektivi ynë është të mësojmë dhe të përmirësohemi në çdo ndeshje,” deklaroi Flick në konferencën për shtyp.
Suksesi i Barcelonës ishte edhe më domethënës duke pasur parasysh vështirësitë e hasura gjatë ndeshjes. Portieri Wojciech Szczęsny u ndëshkua me karton të kuq, duke lënë ekipin me 10 lojtarë për rreth 30 minuta. Por edhe në këto kushte, katalanasit treguan karakter dhe qetësi, duke ruajtur avantazhin e krijuar dhe duke vulosur një fitore madhështore.
“Jam tepër krenar për këtë skuadër. Objektivi i klubeve të mëdha si Barcelona është gjithmonë të fitojnë trofe, dhe ne punojmë fort për këtë qëllim. Tani është koha të tregojmë forcën dhe konsistencën tonë në çdo ndeshje,” përfundoi Flick.
Ky triumf nuk është vetëm një fitore në fushë, por një dëshmi e transformimit të Barcelonës nën drejtimin e Flick. Me këtë paraqitje frymëzuese, katalunasit i japin një mesazh të qartë rivalëve: ata janë rikthyer për të shkëlqyer./04 Online
