Nga koha në kohë, shkenca vazhdon të hedhë dritë mbi rolin e pazëvendësueshëm që ka gjumi në shëndetin tonë.
Por një studim i ri nga Shtetet e Bashkuara ngre një flamur të kuq: gjumi i tepërt mund të jetë po aq i dëmshëm sa mungesa e tij. Studiues nga Universiteti i Teksasit zbuluan se fjetja për nëntë ose më shumë orë në natë lidhet me përkeqësim të funksioneve njohëse dhe kujtesës.
Ky hulumtim afatgjatë u zhvillua mbi një kampion prej 1,853 të rriturish të shëndetshëm, të moshës 27 deri në 85 vjeç.
Gjatë një periudhe 20-vjeçare, pjesëmarrësit iu nënshtruan testimeve të rregullta çdo katër vjet për të matur performancën e tyre në detyra njohëse, përfshirë testet e kujtesës. Së bashku me këto teste, ata plotësuan edhe pyetësorë mbi zakonet e tyre të gjumit.
Rezultatet ishin të qarta: ata që flinin nëntë orë ose më shumë çdo natë shfaqnin performancë më të dobët krahasuar me ata që flinin një sasi mesatare, pra rreth shtatë deri në tetë orë.
Më të rrezikuarit rezultuan të ishin individët që, përveç kohës së gjatë të gjumit, vuanin edhe nga depresioni një kombinim që përkeqësonte ndjeshëm funksionin njohës.
“Çrregullimet në kohëzgjatjen dhe modelin e gjumit rrisin rrezikun e deficiteve njohëse dhe sëmundjes së Alzheimerit,” thekson Vanessa Young, menaxhere e projektit kërkimor në Institutin Glenn Biggs për Alzheimerin dhe Sëmundjet Neurodegjenerative në UT Health San Antonio.
Ndërkohë që gjumi është i domosdoshëm për rigjenerimin e trupit dhe trurit, duket se edhe teprica ka koston e saj. Edhe pse mekanizmat e saktë mbeten ende të paqartë, një teori e avancuar nga studiues suedezë në Institutin Karolinska në Stokholm lidhet me ritmin cirkadian, ora biologjike që rregullon ciklet tona të gjumit dhe zgjimit.
Ndërsa mungesa e gjumit është prej kohësh e lidhur me rënie të performancës mendore, studimi i ri hedh dritë mbi faktin se edhe gjumi i tepërt mund të ketë pasoja të ngjashme.
Ky zbulim përforcon rëndësinë e ruajtjes së një rutine të qëndrueshme të gjumit dhe e bën më të qartë mesazhin që ‘më shumë’ nuk është gjithmonë më mirë, qoftë edhe kur bëhet fjalë për diçka kaq të rëndësishme sa gjumi.
