Një person është gjetur pa shenja jete në orët e hershme të mëngjesit në qytetin e Prizrenit.
Zëdhënësi i Policisë për rajonin e Prizrenit, Shaqir Bytyqi, ka bërë të ditur se rasti është raportuar rreth orës 07:25, kur policia ka pranuar informacion se në rrugën “Enver Buqa”, në lagjen Arbana, një person ishte gjetur i pajetë nga një fqinj.
Sipas policisë, bëhet fjalë për një mashkull rreth 53-vjeçar me inicialet E.S., i cili jetonte vetëm me nënën e tij.
Në vendin e ngjarjes kanë dalë menjëherë ekipet emergjente, të cilat kanë konstatuar vdekjen e tij në shtëpi. Patrullat policore kanë siguruar vendin e ngjarjes, ndërsa më pas kanë intervenuar edhe hetuesit e Sektorit Rajonal të Hetimeve.
Pas përfundimit të ekzaminimit në vendin e ngjarjes, me urdhër të prokurorit kujdestar, trupi i pajetë është dërguar në Institutin e Mjekësisë Ligjore (IML) në Prishtinë për ekzaminim të mëtejmë.
Lidhur me rastin, autoritetet kanë iniciuar hetim për “Hetim i vdekjes”.
