Vedat Muriqi është lider absolut i Mallorcas këtë sezon në La Liga dhe me këtë pajtohet shumë ekspertë të futbollit në Spanjë.
Muriqi i cili ka 12 gola e 2 asistime në La Liga sivjet dhe po garon për të qenë në top treshen e golashënuesve në ligën spanjolle është pa dyshim lojtari i preferuar i tifozëve të Mallorcas.
Gazetari spanjoll, Alvar Moreno thekson se Muriqi është lojtar lider i ekipit dhe ka pëlqimin e madh të tifozëve.
“Muriqi është lojtari perfekt për një ekip si Mallorca. Ai është në gjendje të shënojë duke prekur topin vetëm një herë. Ai është ylli dhe lideri i ekipit, nuk ka dyshim për këtë. Ai ka impresionuar të gjithë fansat duke treguar se çfarë është në gjendje të bëjë në një periudhë kaq të shkurtër kohore”, tha fillimisht gazetari i Tribuna Sol, Alvar Moreno për ‘GazetaBlic Sport’.
Moreno thotë se futbollisti kosovar është i këndshëm me të gjithë dhe kjo e ndihmon atë që të jetë i preferuari në Mallorca.
“Ai është lider. Muriqi kishte një jetë të vështirë në Kosovë dhe këtë e shihni në sjelljen e tij. Ai është gjithmonë i sjellshëm me fansat dhe gazetarët. Ai është në fakt një djalë shumë qesharak që i pëlqen të tregojë anën e tij njerëzore. Kjo është një pjesë e madhe e personalitetit të tij. Dhe mendoj se kjo e ndihmon atë të jetë një futbollist më i mirë dhe të performojë shkëlqyeshëm kur luan”, vazhdoi Moreno.
Sipas Morenos, Muriqi ka kapacitet të luajë për një klub që është më i madh se Mallorca, por nuk beson se do të largohet, pasi sipas tij ai ka synim ta fitojë Kupën e Mbretit me ekipin simpatik spanjoll.
“Ai do të ketë shanse të largohet nga Mallorca për një klub më të madh, jam i sigurt për këtë. Të shënosh gola në La Liga nuk është një gjë e lehtë. Por unë mendoj se pas asaj që ka kaluar, veçanërisht asaj që i ndodhi me Lazio, mendoj se ai do të përpiqet të qëndrojë në Mallorca për një kohë të gjatë. Ai është gjithashtu një njeri familjar dhe e di që ka gjetur një projekt futbolli që i përshtatet. Ai është ylli i skuadrës. Mendoj se do të jetë e mrekullueshme për karrierën e tij të qëndrojë në Mallorca. Ai madje tha se dëshiron të fitojë Copa del Rey në ishull! Kjo është një shenjë e mirë”, përfundoi ai.
Kujtojmë se Mallorca e Vedat Muriqit do të luajë sonte ndaj Atl Madridit në La Liga nga ora 19:30./GBS
