Kandidati për deputet nga PDK-ja, Kujtim Gashi, vazhdoi sot takimet e tij elektorale, ku u ndal në Medvec të Prizrenit, me ç’rast pati mundësinë të takohet me fermerët e suksesshëm të zonës. Gashi theksoi se ata janë një shembull i përkushtimit dhe punës së palodhur për të siguruar jo vetëm mirëqenie për familjet e tyre, por edhe një kontribut të rëndësishëm për zhvillimin ekonomik të Kosovës.
Në fjalën e tij, Gashi theksoi se fermerët e Medvecit kanë përfituar mbështetje nga Komuna e Prizrenit, e cila ka luajtur një rol kyç në zhvillimin e sektorit bujqësor në këtë rajon. Ai shprehu mirënjohjen e tij për punën e tyre, duke shtuar se ata ofrojnë produkte cilësore, që kontribuojnë në rritjen e mirëqenies së gjithë shoqërisë.
Në vazhdën e takimeve të tij elektorale, Gashi ka vizituar edhe një biznes lokal të suksesshëm, i cili merret me përpunimin e mishit, i udhëhequr nga familja Ukaj. Gashi ka theksuar se ky biznes është një shembull i shkëlqyer i suksesit në afarizëm, një nismë që kontribuon në ekonominë e vendit.
Në fjalën e tij, Gashi e ka vlerësuar punën e Naim Ukajt dhe familjes së tij, duke thënë se ata janë një shembull i fuqishëm i aspiratave dhe mundit të shqiptarëve për të arritur sukses në sektorin privat.
Gashi shtoi se do të angazhohet për të mbështetur bizneset lokale dhe për të krijuar kushte më të mira për zhvillimin e sektorit privat në vend.
