Trajneri i Barcelonës, Hansi Flick, u shpreh shumë i kënaqur pas triumfit të katalanasve në Superkupën e Spanjës, ku fituan 3-2 ndaj rivalit të përjetshëm Real Madrid, në finalen e zhvilluar në Jeddah të Arabisë Saudite.
Tekniku gjerman vlerësoi lart paraqitjen e skuadrës së tij, duke theksuar se Barcelona tregoi karakter, disiplinë dhe kontroll të lojës gjatë gjithë ndeshjes. Sipas Flick, fitorja ka një rëndësi të veçantë pasi erdhi ndaj Real Madridit dhe në një finale shumë të fortë.
“Është një fitore fantastike. Jam shumë krenar për mënyrën si ekipi luajti dhe luftoi deri në fund. E kontrolluam lojën dhe qëndruam të fokusuar edhe në momentet e vështira,” u shpreh Flick pas ndeshjes.
Trajneri i Barcelonës veçoi performancën e Raphinhas, i cili realizoi dy gola dhe ishte një nga lojtarët më të spikatur të finales. Flick theksoi mentalitetin dhe kontributin e brazilianit, si dhe punën kolektive të skuadrës në presing dhe mbajtjen e ritmit të lojës.
Një tjetër moment i rëndësishëm për teknikun gjerman ishte rikthimi i Ronald Araujos, i cili u aktivizua si zëvendësues dhe festoi trofeun me bashkëlojtarët. Sipas Flick, prania dhe gëzimi i mbrojtësit uruguaian kanë një ndikim të madh në moralin e ekipit.
Në fund, Flick nënvizoi se ky trofe sjell energji dhe ndjenja shumë pozitive, duke treguar se Barcelona është në formë të mirë dhe e gatshme ta vazhdojë sezonin me vetëbesim të lartë./04 Online
