Fituesi i edicionit të parë të Big Brother VIP Albania, balerini Ilir Shaqiri, ka hyrë në spektaklin Ferma VIP 3 mbrëmjen e së premtes, duke zgjuar interes të madh tek publiku.
Iliri njihet për një karrierë të gjatë në balet dhe për angazhimet si anëtar jurie në disa sezone të “Dancing With The Stars”. Këtë herë, ai ka vendosur të provohet në një format krejt ndryshe, ku jeta dhe sfidat zhvillohen larg komfortit të përditshëm.
Hyrja e tij u prit me pritshmëri, pasi Shaqiri nuk është i panjohur për publikun e reality-show-ve. Ai ka pasur më parë përvojë të ngjashme në Big Brother VIP Albania, ku triumfoi në finalen e BBVA 1 dhe fitoi çmimin prej 100 mijë eurosh, duke u kthyer në një nga emrat më të komentuar të atij sezoni.
Publiku do të vëzhgojë tani se si do të përshtatet balerini me ritmin dhe sfidat e “Ferma VIP 3”, dhe nëse kjo eksperiencë do ta pozicionojë sërish si një nga konkurrentët më të fortë të spektaklit.
