Sulmuesi kosovar, Fisnik Asllani, u shfaq i lumtur të shtunën pas fitores 3:0 të Hoffenheim ndaj Freiburg, ku realizoi golin e parë të ndeshjes.
Asllani nuk kishte shënuar që nga 13 dhjetori dhe tani numëron shtatë gola dhe katër asistime në 21 paraqitje në kampionat.
Përveç kthimit te goli, sulmuesi është i kënaqur me ecurinë e Hoffenheimit, që momentalisht mban vendin e tretë në Bundesligë, pas Bayern Munich dhe Borussia Dortmund, duke shpresuar për një vend në Ligën e Kampionëve.
“Është fitore e merituar, edhe me këtë diferencë golash. Ishim pak të pafat në pjesën e parë, por kemi shpërblyer veten në të dytën. ‘Ne’ është parësore në ekipin tonë. Kemi përvetësuar rutinat tona”, ka thënë Asllani, sipas faqes zyrtare të Hoffenheimit.
Ai ka shtuar se ndihet shumë i integruar në skuadër: “Ndonjëherë e pasoj topin me sy mbyllur, pasi e di saktësisht se ku është dikush. Kur punët shkojnë mirë, natyrisht shumë gjëra janë më të lehta. Por duhet të punosh për këtë”, ka theksuar ylli i ri kosovar.
