Filmi dokumentar ” Pa vend”, i Samir Karahodës, po vijon të rrëmbejë çmime nga festivale prestigjioze. “Pa Vend” është shpallur filmi më i mirë i shkurtë në Edicionin e 33- të Festivalit të filmit në “Trieste Film Festival – Alpe Adria Cinema”.
Juria e garës së filmit të shkurtër, e përbërë nga Špela Čadež (regjisore, producente dhe animatore nga Slovenia), Wim Vanacker (anëtar i Komisionit Përzgjedhës të Konkursit të Filmit të Shkurtër në Festivalin e Filmit në Kanë) dhe Gerald Weber (zëvendës drejtor menaxhues i sixpackfilm – Vjenë) thanë që filmin e zgjodhën për këndvështrimin e tij origjinal.
Për më tepër juria u shpreh “Në një film që kalon kufirin mes dokumentarit dhe fiksionit, një tavolinë Ping Pongu bëhet një alegori për realitetin politik, por edhe një metaforë për kërkimin e një vendi në kohë ndryshimi të shtëpisë dhe migrimit.
Pa Vend na bindi me vendimet e tij formalisht të sakta, kuadrin e tij të pazakontë, këndvështrimin e tij të përqendruar dhe ritmin e tij të saktë.”, thuhet në vlerësimin e jurisë së këtij festivali.
