Klubi i madh turk, Fenerbahçe, ka zyrtarizuar sot prishjen e bashkëpunimit me trajnerin portugez Jose Mourinho, vetëm një vit pas marrjes së drejtimit të skuadrës., shkruan 04 Online.
Vendimi i papritur erdhi menjëherë pas eliminimit zhgënjyes nga play-offi i Ligës së Kampionëve ndaj Benficas, duke i dhënë fund aventurës së teknikut të njohur në Stamboll.
Në komunikatën zyrtare, klubi turk deklaroi:
“Që nga sezoni 2024-2025 Jose Mourinho ka ushtruar detyrën e trajnerit të ekipit tonë të parë. Sot rrugët tona janë ndarë. E falënderojmë për gjithë kontributin e dhënë për skuadrën tonë deri më tani dhe i urojmë suksese në karrierën e tij të ardhshme.”
Mourinho ishte prezantuar me shumë bujë verën e kaluar, duke sjellë entuziazëm dhe pritshmëri të mëdha tek tifozët për një rikthim të Fenerbahçes në majat e futbollit turk dhe evropian.
Megjithatë, humbja nga Benfica dhe rezultatet e paqëndrueshme në kampionat bënë që drejtuesit e klubit të marrin vendimin për ta mbyllur bashkëpunimin me “Special One”./04 Online
