Real Madridi ka pësuar një eliminim befasues dhe të dhimbshëm nga Copa del Rey, pasi u mposht me rezultat 3:2 nga Albacete, skuadër që garon në divizionin e dytë të futbollit spanjoll, në fazën e 1/16-ës së finales.
Kjo humbje historike për “Los Blancos” erdhi në një moment tejet delikat për klubin, pasi ndeshja shënoi debutimin e Álvaro Arbeloas në krye të ekipit të parë, vetëm pak ditë pas shkarkimit të Xabi Alonsos. Eliminimi u vulos në minutat shtesë, me golin vendimtar të Albacetes që shkaktoi reagime të ashpra në opinionin sportiv spanjoll.
Pavarësisht se në disa momente Real Madridi pati më shumë posedim të topit, skuadra madrilene u shfaq e pafuqishme për ta kontrolluar lojën dhe për ta shmangur humbjen ndaj një kundërshtari më modest në letër.
Dështimi nuk kaloi pa reagime, madje as nga rivalët historikë. Ish-mbrojtësi i Barcelonës, Gerard Piqué, reagoi me ironi në platformën Twitch, duke shkruar: “Buen debut del nuevo Madrid” (“Debutim i mirë për Madridin e ri”), një koment tallës drejtuar Real Madridit dhe trajnerit të ri, Arbeloa.
Ky eliminim ka thelluar edhe më shumë debatet rreth krizës sportive që po kalon klubi madrilen, pas një serie rezultatesh negative në fillim të vitit, duke rritur presionin mbi stafin teknik dhe drejtuesit, si dhe duke shqetësuar ndjeshëm tifozët e “Los Blancos”./04 Online
