Gazeta Sinjali mëson ekskluzivisht se një 29-vjeçar ka ndërruar jetë në rrethana të dyshimta sot në mëngjes në Spitalin Rajonal të Prizrenit, çka ka alarmuar autoritetet hetimore.
Burimet e Sinjalit brenda Spitalit bëjnë të ditur se bëhet fjalë për Levent Krasniqin, rreth 29-vjeçar, i cili prej datës 23 korrik 2025 ishte i shtruar në spital për trajtim mjekësor. Sot, më 24 korrik, rreth orës 08:30, viktima ishte duke ecur në parkun e spitalit, kur papritur i është përkeqësuar gjendja shëndetësore.
Ai është kthyer menjëherë në repartin e Emergjencës, por përkundër intervenimit mjekësor, nuk ka arritur të mbijetojë dhe është konfirmuar i vdekur brenda ambienteve spitalore.
Lidhur me rastin, janë njoftuar hetuesit policor, të cilët kanë nisur hetimet për zbardhjen e plotë të rastit.
Trupi i pajetë është dërguar për autopsi në Institutin e Mjekësisë Ligjore, ndërkohë që pritet edhe raporti zyrtar nga hetimet e Policisë Rajonale.
Gazeta Sinjali do t’ju mbajë të informuar me detaje të reja nga hetimi.
