Gianluigi Donnarumma ka vlerësuar lart eksperiencën e tij te Manchester City, duke e cilësuar periudhën në Premier League si më të suksesshmen e karrierës së tij që nga transferimi në Angli në verën e vitit 2025.
Portieri italian, i cili më herët fitoi Ligën e Kampionëve dhe disa tituj kampionë me Paris Saint-Germainin, u bashkua me kampionët anglezë në ditën e fundit të afatit kalimtar veror dhe duket se është përshtatur menjëherë me futbollin anglez.
“Në mendimin tim, Premier League është kampionati më konkurrues në botë. Çdo ndeshje është spektakël, si për t’u parë ashtu edhe për t’u luajtur”, ka deklaruar Donnarumma, duke theksuar intensitetin dhe cilësinë e lartë të futbollit në Angli.
26-vjeçari shtoi se vendimi për t’iu bashkuar Manchester Cityt ishte i mirëmenduar. “Kisha dëgjuar vetëm fjalë pozitive për klubin dhe sapo erdha, e ndjeva menjëherë se isha pjesë e një familjeje të madhe. Jam shumë i lumtur këtu”, u shpreh ai.
Në fund, Donnarumma pati fjalë mirënjohjeje për trajnerin Pep Guardiola dhe ambientin në klub. “Te City ndihesh i vlerësuar dhe i mbështetur. Të punosh me një trajner si Guardiola është një krenari e madhe. Jam vërtet i lumtur që jam pjesë e këtij grupi”, përfundoi portieri italian./04 Online
