Ministria e Financave, Punës dhe Transfereve ka njoftuar se të premten janë nënshkruar dy marrëveshje të grantit në kuadër të projektit “Energjia Efiçiente në Ndërtesat Publike në Prizren”, me vlerë totale prej 1 milion euro.
Sipas njoftimit në kuadër të këtij projekti parashihen intervenimet në rreth 100 ndërtesa publike në Prizren, raporton Telegrafi.
“Projekti në fjalë parasheh rindërtimin, rehabilitimin dhe renovimin e rreth 100 ndërtesave publike, përfshirë qendra të mjekësisë familjare, çerdhe dhe shkolla, me qëllim të garantimit të kushteve më të përshtatshme për qytetarët dhe punonjësit që shfrytëzojnë këto hapësira publike si dhe për të kontribuar në kursimin e energjisë”, thuhet në njoftim.
Aty sqarohet se në këtë ceremoni kanë qenë të pranishëm, ministri i Financave, Punës dhe Transfereve, Hekuran Murati, drejtori i Bankës Evropiane për Rindërtim dhe Zhvillim në Kosovë, Sergiy Maslichenko, dhe nënkryetari i Komunës së Prizrenit, Kujtim Gashi.
Fillimisht është nënshkruar marrëveshja e grantit ndërmjet BERZh-it dhe MFPT-së, e pastaj edhe marrëveshja e nëngrantit, e cila parashikon kalimin e fondeve në Komunën e Prizrenit për zbatimin e projektit në fjalë, raporton Telegrafi.
“Vlen të theksohet se marrëveshjet e nënshkruara sot vijnë pas një marrëveshjeje të ratifikuar vitin e kaluar për të njëjtin projekt, e cila kishte një vlerë prej 5 milionë eurosh. Pra, duke e bërë vlerën totale të marrëveshjeve 6 milionë euro”, përfundon njoftimi i MFPT-së. /Telegrafi/
