Chelsea u rikthye në vendin e katërt në Premier League me një fitore minimale 1-0 kundër një Tottenhami të pafuqishëm, teksa Ange Postecoglou u bë trajneri i parë i Spurs që humb katër ndeshjet e tij të para në kampionat kundër Bluve.
Skuadra e Enzo Marescas ishte shumë pranë golit që në minutën e parë, kur Trevoh Chalobah kërkoi të asistonte Nicolas Jacksonin. Topi u devijua nga Micky van de Ven dhe për pak përfundoi në rrjetë, por goditi shtyllën.
Tottenham tregoi pasiguri në mbrojtje dhe për pak u ndëshkua pas një pasimi të gabuar të Marc Cucurellës, i cili gjeti Malo Gusto-n të lirë, por tentativa e tij përfundoi jashtë kuadratit.
Mbrojtja e Spurs vazhdoi të përballej me vështirësi, ndërsa Jackson shpërdoroi një rast të artë duke gjuajtur mbi portë nga një distancë e afërt.
Portieri Guglielmo Vicario nuk po jepte siguri mes shtyllave për Tottenhamin, por arriti të ndalte një krosim të rrezikshëm të Jadon Sanchos, pasi ky i fundit u shërbye nga Pedro Neto. Në fund të pjesës së parë, mungesa e saktësisë nga të dyja skuadrat bëri që rezultati të mbetej i barabartë.
Chelsea arriti të gjejë golin e merituar në minutën e 50-të, kur Enzo Fernández shënoi me kokë pas një krosimi perfekt nga Cole Palmer, duke ndëshkuar përfundimisht mbrojtjen e pasigurt të mysafirëve.
Dukej se goli i dytë ishte çështje kohe, kur Moisés Caicedo realizoi një vole të mrekullueshme pas një goditjeje dënimi nga Fernández, por pas një shqyrtimi të gjatë në VAR, goli u anulua për pozicion jashtë loje në ndërtimin e aksionit.
Tottenham mendoi se kishte barazuar me një goditje të fuqishme nga Pape Matar Sarr, e cila i shpëtoi portierit Robert Sánchez, por edhe këtë herë VAR ndërhyri, duke anuluar golin për një faull të senegalezit ndaj Caicedos.
Ekipi i Postecoglou vazhdoi të ishte i dobët në sulm, por mund të kishte marrë një barazim dramatik në minutat e fundit, kur Sánchez ndali me sukses një tentativë të Son Heung-min pas një krosimi nga Brennan Johnson.
Nuk ishte një nga përballjet klasike mes këtyre dy rivalëve, të cilat kanë dhuruar spektakël ndër vite – por kjo nuk do t’i shqetësojë Chelsea-n, që regjistroi fitoren e 10-të në 13 përballjet e fundit në kampionat kundër Tottenhamit.
Ndërkohë, kjo humbje e dërgon Spurs në vendin e 14-të, me nëntë disfata në transfertë këtë sezon – një statistikë negative që i kalojnë vetëm Leicester City (11) dhe Southampton (12)./GE
