Chelsea është duke punuar intensivisht për të siguruar shërbimet e Karim Adeyemit gjatë merkatos së verës, pasi londinezët synojnë të forcojnë krahët e sulmit me një lojtar të shpejtë dhe teknik si gjermani, shkruan 04 Online.
Burime pranë klubit londinez kanë konfirmuar se Chelsea ka ndjekur Adeyemin prej kohësh dhe kishte tentuar ta transferonte edhe në janar, por pa sukses. Edhe pse atëherë një marrëveshje nuk u arrit, këtë verë klubi “blu” është i gatshëm të rikthehet me një ofertë konkrete.
Borussia Dortmund ka vendosur një çmim prej rreth 45 milionë eurosh për 22-vjeçarin, një shifër e arritshme për klubet e mëdha të Premier Ligës. Megjithatë, Chelsea nuk është i vetëm në këtë garë. Arsenal është gjithashtu shumë i interesuar për Adeyemin, ndërsa Liverpool mund të futet në betejë, veçanërisht nëse Mohamed Salah largohet këtë verë.
Për më tepër, lojtari është i hapur për një transferim në Angli, pasi kohët e fundit ka ndryshuar agjentin e tij, një lëvizje që shpesh sinjalizon gatishmërinë për të eksploruar opsione të reja.
Për momentin, asnjë ofertë zyrtare nuk është bërë nga asnjë prej klubeve të interesuara, por pritet që negociatat të intensifikohen në javët e ardhshme, sidomos nëse Dortmund tregon gatishmëri për të negociuar./04 Online
