Është hedhur shorti i dueleve çerekfinale të FA Cup, kompeticion shumë i rëndësishëm për klubet dhe tifozët anglezë. Goglat nuk u treguan aspak bujare me Armando Brojën dhe Southamptonin e tij, që do të sfidojë Manchester City për një biletë në gjysmëfinale.
Dueli ndaj armatës së Pep Guardiolës do të zhvillohet më 18 mars në “St Mary’s Stadium”, aty ku u luajt edhe takimi i fazës së parë në kampionat, ndeshje ku 20-vjeçari kuqezi shkëlqeu dhe mori komplimentet e trajnerit spanjoll.
Ylli shqiptar ishte protagonist në kualifikimin e “Shenjtorëve” në çerekfinale. Broja fitoi një penallti dhe realizoi një eurogol në suksesin 3-1 ndaj West Ham, edhe pse e nisi takimin nga stoli dhe u fut në fushë në pjesën e dytë.
Chelsea do të ketë përballë Middlesbrough. Ekipi që garon në Championship eliminoi Tottenham. Nottingham Forest ose Huddersfield për Liverpoolin e Klopp. Ndërkohë, çifti tjetër çerekfinal do të jetë midis Boreham Wood dhe fituesit të përballjes Crystal Palace-Everton.
