Lionel Messi është në një udhëkryq sa i takon të ardhmes. Rinovimi i kontratës me PSG ka ngecur teksa “pleshti” është i tunduar nga ideja për t’u riktyher në Spanjë tek Barcelona dhe për ta mbyllur në mënyrën e duhur historinë e tij me katalanasit pasi para dy viteve ishte një përshëndetje e ftohtë me tifozët.
Së fundmi, babai dhe njëkohësisht agjenti i tij, Jorge është takuar me presidentin Joan Laporta dhe tashmë zërat janë bërë edhe më të zhurmshëm. Edhe vetë trajneri Xavi Hernandez, u shpreh se Barcelona është shtëpia e Messit dhe se dyert janë gjithnjë të hapura për argjentinasin.
“Nuk kam shumë për të thënë rreth të ardhmes së Messit. Unë e kam theksuar gjithnjë se Barcelona është shtëpia e tij dhe se këtu i ka gjithnjë dyert e hapura. Më shumë nuk mund të them, Messi është një mik për mua, jemi gjithnjë në kontakt dhe flasim për shumë tema. Varet shumë nga ai dhe nga ajo se çfarë do të bëjë, këtu në Barcelonë e presin të gjithë”, u shpreh Xavi./SS
