Dega e AAK-së në Prizren e ka konsideruar projektbuxhetin e komunës së Prizrenit për vitin 2025 si të dëmshëm, jozhvillimor dhe kriminal.
Sipas këtij subjekti politik, projektbuxheti nuk është gjithpërfshirës, nuk është i bazuar në kërkesat aktuale konkrete të qytetarëve dhe ka shumë projekte të gjeneralizuara.
“Aleanca për Ardhmërinë e Kosovës – Dega në Prizren – e konsideron projektbuxhetin e Komunës së Prizrenit për vitin 2025 të dëmshëm, jozhvillimor dhe kriminal.
Pas analizimit të këtij draftbuxheti, në mbledhjen e kryesisë, të mbajtur për këtë çështje, u ngritën një sërë shqetësimesh dhe të gjithë anëtarët e pranishëm të kryesisë u pajtuan njëzëri lidhur me problemet që i ka ky buxhet.
Ky draftbuxhet:
- nuk është gjithëpërfshirës pasi përjashton shumë lokalitete dhe kategori të komunës sonë;
- nuk është i bazuar në kërkesat aktuale konkrete të qytetarëve, por më tepër është bartje e projekteve vit pas viti;
- ka shumë projekte të gjeneralizuara, duke lënë hapësira për shkelje ligjore dhe duke favorizuar vetëm mbështetësit politikë.
Miratimi i draftbuxhetit të tillë nuk i ofron komunës sonë zhvillim ekonomik, nuk prek shumë lokalitete e kategori të shoqërisë dhe lë hapësira për keqpërdorim të parasë publike.”, thuhet në komunikatën për media nga AAK-ja në Prizren./04 Online
