Një mjek i përgjithshëm (GP) ka paralajmëruar ata që shpesh ndihen të lodhur të jenë të vëmendshëm ndaj dy shenjave të rrezikshme që mund të tregojnë një sëmundje të rëndë dhe dobësuese.
Ndërsa ndjenja e lodhjes për periudha të caktuara zakonisht nuk është shqetësuese, nëse vazhdon për disa javë ose më shumë, duhet të kërkoni ndihmë mjekësore, paralajmëron Dr. Milli Raizada, një mjeke e NHS-së e specializuar në shëndetin hormonal.
Është gjithashtu thelbësore të vizitoni një mjek nëse lodhja shfaqet pas aktivitetesh të lehta fizike, siç është ngjitja e shkallëve apo një klasë yoga – një fenomen i njohur si lodhje pas mundimit fizik (post-exertional malaise).
Të dyja këto janë shenja të sëmundjes sindroma e lodhjes kronike (CFS), e njohur gjithashtu si mialgjia encefalomieliti (ME), sipas Dr. Raizadas.
Kjo gjendje, e cila prek rreth 250,000 njerëz në Mbretërinë e Bashkuar, karakterizohet nga probleme të rënda me gjumin, vështirësi në të menduarit, përqendrim dhe kujtesë.
Shumë pacientë e kanë pothuajse të pamundur të bëjnë një jetë normale, pasi simptomat u kufizojnë aftësinë për të punuar dhe kryer aktivitetet e përditshme.
Por sipas Kolegji Mbretëror i Kirurgëve, vetëm 10 për qind e atyre që vuajnë nga kjo gjendje marrin një diagnozë.
Kjo mund të ndodhë sepse disa nga simptomat kryesore shpesh neglizhohen, thotë Dr. Raizada.
“Lodhja e zgjatur dhe e vazhdueshme për më shumë se gjashtë muaj përmbush kriteret diagnostikuese për CFS/ME, por edhe lodhja që vazhdon për disa javë nuk duhet injoruar,” tha ajo për HuffPost UK – transmeton GazetaExpress.
“Një vlerësim i hershëm dhe analizat e gjakut mund të ndihmojnë në identifikimin ose përjashtimin e shkaqeve të mundshme.”
Simptoma të tjera të kësaj sëmundjeje – e cila ka prekur edhe komedianen Miranda Hart – mund të përfshijnë vështirësi njohëse, si probleme me kujtesën dhe përqendrimin.
“Dhimbje muskulore ose të kyçeve, dhimbje koke të pashpjegueshme, marramendje ose palpitacione në zemër” mund të shoqërojnë gjithashtu lodhjen.
E njëjta gjë vlen edhe për “dhimbjet e shpeshta të fytit ose gjëndrat e fryra, që sugjerojnë një mosfunksionim të sistemit imunitar”, shtoi Dr. Raizada.
Si trajtohet sindroma e lodhjes kronike?
Nuk ka një kurë për CFS, por mjekët mund të përdorin disa ilaçe për të trajtuar simptomat, përfshirë antidepresantët, fizioterapinë dhe këshillimin.
NHS thekson se menaxhimi i energjisë mund të jetë një nga trajtimet më efektive, duke ofruar udhëzime se si të shfrytëzohet më së miri energjia e disponueshme pa përkeqësuar simptomat.
Historia e Miranda Hart me sindromën e lodhjes kronike
Vitit e kaluar, aktorja dhe komediania Miranda Hart tregoi për luftën e saj 30-vjeçare me sindromën e lodhjes kronike, e cila e la të shtrirë në shtrat dhe pa gëzim në jetë.
Fillimisht, ajo u diagnostikua gabimisht me agorafobi (frikë nga hapësirat e hapura), por më vonë mësoi se sëmundja e patrajtuar e Lyme ishte zhvilluar në sindromën e lodhjes kronike (ME).
Në autobiografinë e saj, Miranda tha se kishte luftuar për të përballuar simptoma neurologjike të frikshme, të cilat filluan kur ajo ishte vetëm 14 vjeç.
Ajo shpjegoi se gjendja e saj u përkeqësua ndjeshëm në të 40-at, së bashku me një rritje të lodhjes.
Duke kujtuar momentin kur mori diagnozën e saj, ajo tha:
“Mbylla laptopin pas asaj thirrjeje në Zoom dhe thjesht qëndrova e heshtur, e tronditur”.
“Ndjeva një përzierje emocionesh – isha e shokuar, por edhe ndjeva një trishtim të thellë dhe zhgënjim.”
“Për më shumë se tre dekada, KISHA DITUR se diçka nuk shkonte.”
“Më kujtohen të gjitha herët që u kam thënë mjekëve të ndryshëm: ‘Ndjej sikur jam e helmuar’, ose ‘Është si të kem grip çdo ditë, por pa temperaturë’.”
“(Është e pabesueshme sesi trupi nganjëherë mund të na tregojë saktësisht se çfarë po ndodh.)
“Ndjeva zemërim për herët kur më ishte thënë se duhej të kem agorafobi.
“Mundohesha ta trajtoja si të tillë, kur në fakt ishte mungesa e energjisë dhe ndjeshmëria ekstreme ndaj dritës dhe zhurmës që më bënte të rrëzohesha kur dilja jashtë ose përpiqesha të isha pjesë e ndonjë aktiviteti apo ambienti të gjallë.” /GazetaExpress/
