Pas një vakti të bollshëm, ideja për t’u shtrirë në divan duket shumë joshëse. Por, sipas ekspertëve të shëndetit, qëndrimi plotësisht pasiv pas ngrënies mund të mos jetë zgjedhja më e mirë për trupin tonë.
Në fakt, pak aktivitet i lehtë mund të ndihmojë në tretje dhe në përpunimin më efikas të ushqimit. Ushqyerja nuk duhet të ndalojë lëvizjen, përkundrazi, ajo mund të shoqërohet me lëvizje të moderuar.
Sipas nutricionistes Nicolette Pace, një shëtitje e qetë pas ngrënies ndihmon në përmirësimin e metabolizmit, zvogëlon ruajtjen e yndyrës dhe ndihmon në balancimin e sheqerit në gjak. Edhe disa minuta çiklizëm me intensitet të ulët apo joga e butë janë opsione të mira.
Trajneri i fitnesit Baltazar Villanueva paralajmëron se ushtrimet e rënda si vrapimi intensiv apo ngritja e peshave nuk rekomandohen menjëherë pas ushqimit, pasi mund të shkaktojnë shqetësime të tretjes dhe të përziera. Arsyeja? Trupi është ende i përqendruar në tretje dhe aktiviteti i fortë e largon qarkullimin e gjakut nga stomaku drejt muskujve.
Në varësi të llojit të vaktit, rekomandohet të prisni 30–60 minuta për një vakt të lehtë dhe deri në dy orë për një vakt të rëndë, përpara se të bëni ushtrime më të forta.
Cilat janë ushtrimet më të përshtatshme pas ngrënies?
-Shëtitje e lehtë
-Çiklizëm i butë
-Shtrirje ose joga relaksuese
Çdo organizëm është ndryshe. Nëse ndiheni të fryrë apo të rënduar, është më mirë të prisni ose të kufizoheni në lëvizje shumë të lehta. Gjëja më e rëndësishme është të jeni në harmoni me sinjalet që ju jep trupi juaj.
