Kandidati për kryetar të Prizrenit nga Bashkimi Demokratik, Zafir Berisha, ka prezantuar programin e tij qeverisës, duke theksuar se ndryshimi për qytetin është një domosdoshmëri dhe jo luks. Ai kërkon besimin e qytetarëve në zgjedhjet e 12 tetorit, ku garon me numrin 144 në fletëvotim, shkruan 04 Online.
Berisha thekson se objektivat e tij do të jenë në përputhje me përgjegjësitë ligjore dhe kushtetuese të pushtetit lokal, duke u realizuar në bashkëpunim me institucionet shtetërore për interesin e qytetarëve.
Postimi i plotë i Zafir Berishës
Ndryshimi nuk është luks-është nevojë për Prizrenin!
Këtë ndryshim mund ta bësh t’i me votën tënde, duke votuar me 12 tetor, nr 144.
Objektivat tona do të jenë në përputhje me përgjegjësitë ligjore dhe kushtetuese të pushtetit lokal, të cilat do të realizohen në bashkëpunim me institucionet e tjera shtetërore për interesat e qytetarëve të Prizrenit.
Investime cilësore në rrugë, trotuare, kanalizim të ujërave të zeza dhe ndriçim publik; sinjalistikë rrugore, transport publik funksional e të qëndrueshëm në qytet dhe fshatra.
Mbrojtja dhe promovimi i trashëgimisë kulturore të Prizrenit. Qyteti ynë ka një trashëgimi unike historike e cila duhet të ruhet dhe promovohet si pjesë e identitetit qytetar.
Mbrojtja dhe restaurimi i objekteve historike në bashkëpunim me ekspertë të fushave përkatëse.
Rivitalizimi i hapësirave dhe programe për të rinjtë; qendrave rinore si dhe trajnime profesionale, projekte kulturore e sportive, me qëllimin për të rritur mundësitë që të rinjtë t’i qasen më lehtë tregut të punës.
Lehtësira dhe mbështetje për sipërmarrësit lokalë, sidomos në sektorët e turizmit, zejtarisë dhe teknologjisë.
Krijimi i kushteve dhe mbështetja e turizmit rural dhe malor.
Pastrimi i lumenjve (sidomos Lumbardhit), menaxhimi i mbeturinave dhe krijimi i sistemit të riciklimit për ta bërë Prizrenin një qytet të mirëfilltë ekologjik.
Rritja e sipërfaqeve të gjelbërta dhe krijimi i parqeve në lagjet që kanë mungesë të tyre.
Krijimi i platformave digjitale për konsultim me qytetarët dhe marrja e propozimeve të tyre; si dhe raportim i rregullt për punët e kryera nga komuna, shpenzimin e buxhetit dhe projektet e realizuara.
Bashkë për të mirën e Prizrenit!
