Atletico Madrid do të jetë pa dy prej mesfushorëve kryesorë në derbin e fundjavës ndaj Real Madridit të shtunën. Los Rojiblancos vijnë me moral të lartë pas fitores dramatike ndaj Rayo Vallecanos, ndërsa përgatiten për derbin e dytë lokal brenda javës.
Nuk është surprizë mungesa e Jose Maria Gimenez, i cili po rikuperohet nga një dëmtim muskulor dhe do të rikthehet gradualisht në skuadër. Ai nuk pritet të jetë gati. Lajm më pozitiv është ai për Alex Baena, i cili ishte në stol kundër Rayo-s dhe mund të marrë minuta kundër Real Madridit. Përforcimi i madh i verës është duke u rikuperuar nga apendiciti, për të cilin iu nënshtrua një operacioni.
Megjithatë, Diego Simeone do të jetë pa Johnny Cardoso dhe Thiago Almada, dy nga afrimet e verës. Mungesa e Cardoso-s ishte e pritshme, pasi raportimet thonë se ai nuk do të kthehet para pushimit të tetorit për ndeshjet ndërkombëtare. Ndërsa kishte shpresë që Almada të rikthehej me kohë, por Pedro Fullana i Cadena SER ka konfirmuar se të dy do të mungojnë në derbin e fundjavës.
Trajneri i Real Madridit, Xabi Alonso, gjithashtu ka dilema nëse ta hedhë sërish Jude Bellingham nga minuta e parë, pasi i dha rreth gjysmë ore lojë kundër Espanyolit dhe Levantes nga stoli. Los Blancos do të jenë pa Antonio Rudiger dhe Trent Alexander-Arnold, të cilët janë ende në fazë rikuperimi nga dëmtime muskulore afatgjata.
Mesfusha do të jetë një nga repartet ku Simeone do të mendohet më së shumti për zgjedhjet e tij. Kundër Rayo-s, Conor Gallagher dhe Marcos Llorente ishin në krah të Koke Resurrección dhe Pablo Barrios, megjithatë Llorente zakonisht ka luajtur si mbrojtës i djathtë.
Barrios e ka të sigurt një vend titullari, ndërsa alternativat kryesore të Simeones janë Giuliano Simeone dhe Nicolas Gonzalez, të cilët mund të përdoren në krah. Si Llorente ashtu edhe Gallagher mund të luajnë në qendër, por Koke ka qenë ndoshta një nga lojtarët më të mirë të Atletico-s në ndeshjet e fundit.
