Një ditë e rëndësishme për fshatin Kobaj dhe lagjet përreth, pasi sot u përurua fusha sportive dhe rrethoja e shkollës, si dhe filluan punimet për realizimin e projekteve infrastrukturore, që përfshijnë edhe ndërtimin e 14 akseve rrugore.
Kryetari i Prizrenit, Shaqir Totaj, në ceremoninë përurimit theksoi:
“Ndërsa të tjerët flasin për fshatin Kobaj, ne punojmë me veprime konkrete për ta përmirësuar jetën e banorëve tanë. Sot dhamë një shembull të qartë me përurimin e fushës sportive dhe rrethojës së shkollës, si dhe fillimin e projekteve infrastrukturore që do ta ndryshojnë rrënjësisht pamjen dhe funksionalitetin e këtij vendbanimi. Nga sot, Kobaj po merr pamje të re dhe ky është vetëm fillimi. Përkushtimi ynë është që ta përfshijmë çdo lagje dhe fshat në zhvillimin e qëndrueshëm të komunës sonë”.
Me këto investime, fshati Kobaj shndërrohet në model të zhvillimit lokal, duke siguruar kushte më të mira për edukimin, sportin dhe lëvizjen e banorëve.
