Rrahmani: Presioni për fitore tek çekët

0
35

Amir Rrahmani e ka të qartë se në Plzen Kosovën e pret një ndeshje shumë e vështirë, ku Kosovës i nevojitet fitorja për të patur mundësi të mëdha për t’u kualifikuar në Evropian.

Mbrojtësi i Veronës, pas stërvitjes së sotme në stadiumin “Fadil Vokrri”, në konferencë për media ka theksuar se pret një përballje me tension, por sipas tij presioni mund të jetë më i madh te vendasit dhe këtë “Dardanët” duhet ta shfrytëzojnë.

“E dimë që është një ndeshje shumë e vështirë, sepse luajmë ndaj kundërshtarit direkt për vendin e dytë. Takimin e parë në shtëpi e kemi fituar 2-1, por atje do të jetë shumë ndryshe, me shumë presion. Presioni nuk do të jetë vetëm mbi ne, madje Çekia do të ketë më shumë presion. Ndoshta është më mirë për ne që ata kanë më shumë presion për fitoren. Kështu që do të jetë një përballje me tension, por qëllimi ynë kryesor është të japim maksimumin. Besoj që rezultati do të vijë”, ka thënë mbrojtësi i Dardanëve.

Kosova mund të kualifikohet në Evropian dhe nëpërmjet Ligës së Kombeve, por Rrahmani këmbëngul se ekipi nuk duhet të shfokusohet duke menduar se e ka edhe një mundësi tjetër.

“Përderisa kemi shans që të kualifikohemi nëpërmjet kualifikueseve të Evropianit, po, besojmë se mundemi dhe duhet ta provojmë. E kemi thënë me kohë që nuk duhet të mendojmë për Ligën e Kombeve sepse kemi përpara kualifikueset. Të gjithë lojtarët janë të fokusuar aty”, ka theksuar Rrahmani.

Leave a Reply