Presidenti i Kosovës Hashim Thaçi është bërë pjesë e debateve virtuale lidhur me çështjen e ndërtimit të Xhamisë së Madhe.
Ndërsa ka kujtuar vënien e gurthemelit të Katedrales në Prishtinë bashkë me Presidentin e ndjerë, Ibrahim Rugova, Thaçi ka thënë se askush nuk ka asnjë arsye të ndjehet i fyer apo i anashkaluar mbi bazat fetare në Kosovë, njofton Klan Kosova.
”Ndjehem mirë dhe krenar, që së bashku me kreun e komunitetit të besimtarëve të krishterë dhe me Presidentin Rugova kemi vënë gurthemelin e Katedrales në Prishtinë. Po ashtu, ndjehem mirë dhe krenar, që së bashku me kreun e komunitetit të besimtarëve myslimanë dhe me Presidenten Jahjaga e vumë edhe gurthemelin e Xhamisë në Prishtinë.
Kosova është shembulli më i mirë, jo vetëm në rajon, por edhe më gjerë për tolerancën dhe bashkëjetesën e shkëlqyer ndërfetare, shekuj me radhë.
Askush nuk ka asnjë arsye që të ndjehet i fyer, i anashkaluar apo i privilegjuar mbi baza fetare në shtetin tonë modern.
Protesta dhe shprehja e pakënaqësisë janë vlera demokratike në shoqërinë tonë, por ato asnjëherë nuk duhet të shërbejnë për nxitjen e urrejtjes ndërfetare dhe ndëretnike.
Zoti e bekoftë Kosovën dhe popullin e saj! HTH”.
