Kryeministri i Republikës së Kosovës, Albin Kurti së bashku me zëvendëskryeministrat dhe ministrat ka bërë homazhe në kompleksin memorial “Dëshmorët e Kombit”, në Gllogjan, shkruan IndeksOnline.
Kurti para mediave deklaroi se 24 marsi 1998 i Epopesë së Duakgjinit dhe 24 marsi 1999 ndërhyrja e NATO-s tregojnë rrjedhën logjike të gjërave.
Ai tha se “së pari pushka jonë e pastaj avionët e NATO-s, ngjashëm edhe sot së pari puna jonë e pastaj edhe ndihma prej jashtit për zhvillim, demokratizim e për drejtësi”.
“23 vjet më parë, më 24 mars këtu në Gllogjan u dha kushtrimi i lirisë në Dukagjin. Lufta çlirimtare u përhap gjithandej dhe një vit më vonë pushkëve të lirisë iu bashkuan avionët e NATO-s dhe nuk vonoi u çlirua Kosova. 24 marsi i Epopesë së Dukagjinit 1998 dhe 24 marsi 1994 i ndërhyrjes së NATO-s thuajse na tregojnë rendin logjik të gjërave, së pari pushka jonë e pastaj avionët e NATO-s, ngjashëm edhe sot së pari puna jonë e pastaj edhe ndihma prej jashtit për zhvillim, demokratizim e për drejtëesi.
Në ditët e shënuara si kjo ne bëjmë nderim për dëshmorët e kombit, ata që dhanë gjithçka që ne mund të jetojmë të lirë dhe të përparojmë”, shtoi ai.
