Gërxhaliu – ministrit Hamza: Mos e nënshkruaj rritjen e pagave, do ta dëmtojë Kosovën

0

Kryetari i Odës Ekonomike të Kosovës, Safet Gërxhaliu, ka ftuar ministrin e Financave Bedri Hamza të mos e nënshkruajë vendimin për rritje të pagave i cili ka hasur në reagim kritik në Kosovë.
“Vendimi për rritje të pagave nga ana e Qeverisë së Kosovës është në kundërshtim me zhvillimin ekonomik të Kosovës. Unë ftoj ministrin Hamza të mos e nënshkruajë këtë vendim pasi që ky vendim do të dëmtojë shumë Kosovën”, tha Gërxhaliu.

Sipas tij, vendimi për rritje enorme të pagave për një pjesë të zyrtarëve shtetërorë do të dëmtojë edhe më shumë sektorin privat, i cili në kohët e fundit po ndeshet me shumë probleme të mëdha sa i përket gjetjes së fuqisë punëtore, pasi që shumë të rinj ëndërrojnë të punësohen në administratë publike.
“Vendimi për rritje të pagave e dëmton Kosovën, në aspektin ekonomik, social, integrues, e në veçanti në aspektin psikologjik e demotivues për të rinjtë”, theksoi Gërxhaliu.
Ai bëri me dije se në fillim kanë menduar se Qeveria do të merret më shumë me edukim, e zhvillim ekonomik dhe promovim të ndërmarrësisë vendore, por vendimi për rritje të pagave është në kundërshtim të këtyre objektivave.
“E tëra kjo e dëshmon edhe shqetësimin tjetër që sot më tepër mbrohen interesat e grupeve të caktuara sesa interesat e qytetarëve të Kosovës”, tha ai.
Kryetari i Odës Ekonomike të Kosovës Safet Gërxhaliu beson në profesionalizmin dhe etikën e ministrit Hamza dhe ai nuk do të nënshkruajë vendimin për rritje të pagave.